Bainvnüts a l`EBexpo 2018

Stimadas damas, stimats signuors
Chars indigens e giasts

Adonta da tscherts resultats da votumaziuns federalas, vaja magari bain a l’economia svizra. Mincha resultat democratic da votaziun sto gnir acceptà, quai s’inclegia da sai. Però tscherts resultats han daplü o damain influenza sün nossa regiun.

Sainza dubi ha gnü la votaziun a reguard las seguondas abitaziuns üna fich grond’influenza sün tuot il Grischun e consequenzas impustüt per l’Engiadina. Progets da fabrica chi füssan stats planisats sur decennis d’ons sun gnüts realisats infra pac mumaint. Intant però es ida la construcziun sur terra ferm al main. Per furtüna investischan ils cumüns ed impustüt il Chantun illa construcziun bassa, quai chi cumpensescha ed egualisescha ün pa la situaziun da fabrica.

Nus vivain in üna regiun da cunfin. Quai voul finalmaing eir dir, cha noss’economia es fermamaing in concurrenza. Da stübgiar dà per exaimpel, cha vivondas chi vegnan cumpradas in Austria sun – eir causa la Bainvgnüts a l’EBexpo 2018 a Scuol restituziun da l’imposta da plüvalur – almain 20 pertschient plü favuraivlas co in Austria.

Quai es ün fat, cun quel stuvaina viver. I nun ans resta co da persvader als indigens ed als giasts, cha prodots e servezzans da noss’economia regiunala sun da fich buna qualità e cha noss affars sun fich innovativs. Dal rest sun noss’affarists ragiundschibels eir las fins d’eivna, scha prodots, installaziuns, maschinas e veiculs causeschan problems. Quai es üna prestaziun importanta chi nu das-cha gnir suotvalütada.

Co pudaina però persvader a noss indigens ed a noss giasts da la buna qualità e dal spiert d’innovaziun da noss affars? In prüma lingia spordscha l’EBexpo 2018 üna buna plattafuorma per as preschantar. Quia han ils affars d’Engiadina Bassa la pussibiltà da cumprovar lur prestaziun ed innovaziun. Per tuot quels chi crajan, cha a l’ester saja tuot plü bunmarchà e meglder, giavüschaina da congualar maila cun maila, e da resguardar cha buna qualità ha seis predsch.

In occasiun da l’EBexpo 2013 n’haja dudi plüssas jadas, cha giasts ed eir indigens, nu savaivan, cha tscherts prodots e servezzans vegnan insomma sports in Engiadina Bassa. Perquai es nossa mansteranza obliada d’infuormar detagliadamaing e da maniera adequata.

Nus lain però listess appellar a giasts ed indigens: Eir pro nus dess valair – «Engiadina first!» L’EBexpo 2018 düra be trais dis e bleras infuormaziuns giaran cul temp in invlidanza. Perquai laina trar adimmaint, cha sülla pagina d’internet www.hgv-unterengadin. ch exista ün dossier da commerzi e mansteranza chi preschainta ils singuls affars. Eir als affars laina render attent da trar a nüz quista sporta.

L’EBexpo 2018 dess esser üna bella festa per tuot l’Engiadina Bassa. Perquai spordschaina in venderdi e sonda saira eir musica e trategnimaint fin aint per la not. Nus sperain sün gronda cumparsa. Nus ingrazchain als indigens ed als giasts per la visita a l’exposiziun, per la fideltà ed il sustegn.

In nom da la Società da commerzi e mansteranza Engiadina Bassa
Claudio Andry, president