Bainvgnü a l`EBexpo 2013

Stimadas damas e stimats signuors
dilets partenaris
chars indigens e giasts

Dürant üna crisa crescha la necessità da sinergias ill’economia. Uschè gnit fundada dürant ils ons 30 la Società da commerzi e mansteranza Engiadina Bassa e dürant la stagnaziun dals ons 90 organisada ün’Ebexpo. Ultimamaing ha publichà la Confederaziun ün stüdi dal BAK-Basel. Quel conferma, cha sco consequenza da l’iniziativa da las seguondas abitaziuns van a perder illas muntognas Svizzras dürant ils prossems ons fin sur 10 000 plazzas da lavur. Perquai ha decis la suprastanza da noss’associaziun, cul sustegn da plüs impressaris, d’organisar l’Ebexpo 2013.

Implü vain realisada üna plattafuorma cun ün dossier detaglià da l’economia chi preschainta la qualità engiadinaisa. Tuot ils affars, commembers e na commembers, pon as preschantar sün quista plattafuorma chi vain actualisada regularmaing.

Per ün avegnir chi prosperescha es eir la scolaziun da nossa giuventüna d’ourdvart grond’importanza. Üna priorità da noss’exposiziun es da preschantar las pussibiltats da scolaziuns e giarsunadis in nossa regiun.

Cun quist’exposiziun vulaina muossar las capacitats da noss affars e cun quai muossar, cha noss’economia es pronta pellas sfidas da l’avegnir.

No vulain eir spordscher alch a la populaziun e giasts da nossa regiun. No organisain illa tenda da festa, in venderdi e sonda saira, adüna da las 18.00 fin las 02.00 concerts cun plüssas fuormaziuns da musica per gronda part indigenas.

No sperain sün üna numerusa cumparsa d’indigens e giasts e’S ingrazchain pella fiduzcha in, e’l sustegn da noss’economia.

I’l nom da las Società da commerzi e mansteranza
Claudio Andry, president