Qualità indigena

Globalisaziun, avertüra dals cunfins, transit liber da persunas, contrats bilaterals, il muond vain adüna plü avert e plü collià. Servezzans e materials pon gnir postats dapertuot. Grazcha a l'internet dafatta infra cuort temp. Pel plü va in quist cas a perder l'economia e la mansteranza indigena. Eir scha güsta quella spordscha la qualità necessaria.

Per preschantar quista buna qualità dal commerzi e da la mansteranza in Engaidina Bassa, ha la Società da commerzi e mansteranza decis da realisar ün dossier da mansteranza. Il böt da quist dossier es da preschantar precis quista qualità indigena. Grazcha a quista concentraziun da buna qualità indigena, survegnan investuors e persunas privatas chi vöglian realisar progets in Engiadina Bassa üna survista da las lavuors chi vegnan sportas ed impustüt eir da las dittas chi spordschan las lavuors in Engiadina Bassa. Implü as vain eir a cugnuoscher che cha l'Engiadina Bassa spordscha sco lö da lavur e d'abitar.

La mansteranza indigena spordscha blers avantags e bler savair, cha ingün oter nun ha.

Svilup economic in üna regiun ambiziusa

Ün stüdi da la BAKBASEL, chi'd es gnü publichà in mai 2010, demuossa cha l'Engiadina Bassa ha fat a reguard la creaziun da valur ün grond svilup economic. Uschè importaiva il product naziunal brüt (BIP) l'on 2008 CHF 68'837 per cheu. Cun quist import es l'Engiadina Bassa sur la media dal Grischun (CHF 64'000) ed ha registrà dal 2003 fin dal 2008 cun 3.5 % l'augmaint il plü ot dal BIP in tuot il chantun Grischun. Ün svilup remarchabel a pensar, cha la BAKBASEL ha prognostichà per l'Engiadina Bassa ün regress pel 2013. Grazcha a prodots innovativs e lavuors da buna qualità dal affars indigens ha quist regress pudü gnir evità.

Per cha la regiun possa profitar eir in avegnir e per cha la creaziun da valur resta illa regiun, esa important da resguardar la mansteranza indigena. Be uschè pon gnir sgüradas las plazzas da lavur gnir generadas entradas d'impostas.

«Viver e cumprar illa regiun» es fich important per cha l'economia possa surviver. E natüralmaing eir per cha'l svilup possa continuar e per ragiundscher danövmaing las cifras allegraivlas dals ultims ons.